Feleka Bêbext

Feleka Bêbext

Afbeeldingsresultaat voor ‫عثمان صبري‬‎ Nemir : Osman Sebrî

Feleka bêbext şikand darê min
Nema kes rûniştî li ber arê min
Ji du hezar sal heya bi îro
Azadî nema di nav warê min
Zorkerên bêbav bi fend û xapan
Di berhev xistin dost û yarê min
Qenc û çakên min tev dane kuştin
Qelandin riça karguzarê min
Serek û rêber di welêt neman
Li erdê hiştin koç û barê min
Ji hev perçe bû Kurdistana gewr
Ket nava destê çar neyarê min
Kirine guneh bi kurdî peyvîn
Wan divê rakin ziman, zarê min
Dewlemendê min hate şêlandin
Ji welêt derket tev zîvarê min
Ew kesên ku xwe mezin dinasîn
Roja teng nebûn bendewarê min
çend heb ji wana mabûn di meydan
îro tev revîn ji ber barê min
Hinek ji wana bê şerm û fihêt
Bi destê neyar bûn sîmsarê min!..
Dixwazin îro bi hîzebûnî
Bi derxin kurdan ji ber karê min
Qirakê, tot û tund ketin warê min
Koleyên kolî kolîdarê min!..
Ji xeynî felek min hene neyar
Li dora welêt bûne çarnikar.
Osman Sebrî
05.01.1905 - 11.10 . 1993